Þá er komið að því að pöpullinn viðri skoðanir sínar, gangi til kjörklefa og viðri ekki skoðanir sínar.
Ekki líst mér á þessa þjóð ef FLokkurinn fær yfir 20% atkvæða eins og kannanir síðustu daga benda til. Þá spyr ég: Hvurslags hálfvitar hafa eiginlega kosningarétt í þessu landi? Má svo illu venjast að gott þyki eða er þrælsóttinn innbygður í sálirnar svartar og hvítar, örlar ekki á gagnrýnni hugsun eða er trúin svona blind að hún nái út yfir allt sem skynsamlegt er? Það má kannski segja að svo sé komið sem er vegna þess að menn kusu vitlaust í 18 ár.
Ágætu kjósendur (hér á undan hálfvitar) þið eruð ekki að fara að velja ykkur lið til að vera í. Þið eruð að fara að kjósa um framtíð lands og þjóðar gerið ykkur grein fyrir því ef þið getið. Verðlaunið ekki spillingar og sjálftökuliðið sem rændi þjóðina og börn okkar tækifærum, allt vegna græðgi, tillits og virðingarleysis við heiðarlegan almenning. Veltið fyrir ykkur hvort eitthvað réttlætir að fyrirtæki rétti stjórnmálamönnum peninga og þá einnig til hvers það er gert. Til góðra verka etv? Já já af hverju ættu stjórnmálamenn að þurfa peninga til þess? Er einkavæðingin þar með talið þegar bankarnir og síðar Síminn voru gefnir réttum mönnum, hrunið sem er niðurstaða hægrimennskunnar, REI málið, mútugreiðslurnar, rán auðlinda og margskonar yfirgangur í krafti fjármagns bara allt í lagi? Nei ég held nú síður. Rétt væri að meina FLokknum og framsóknarliðinu að bjóða fram til Alþingis fyrr en á næsta kjörtímabili í það fyrsta. Þessir menn hafa barasta engan áhuga á fólki, bara peningum og grilli. Peningar fyrst, seðja eigið hungur svo, það er forgangsröðunin. Kunna svo ekki að skammast sín fyrir gjörðir sínar og afleiðingar þeirra, þessir sálarlausu peningapúkar. Hafa fjármagnseigendur og sjálftökumenn e.t.v. rétt til að skerða lífsgæði annarra án þess að við þeim sé hróflað? Ég segi nei við því og nei við þeirri misskiptingu sem þegar viðgengst.
Einkavæðing: Til helvítis með hana við höfum dæmin. ” Einkavinir reka fyrirtæki betur en aðrir”. Já já horfið um öxl, Róm er brunnin að baki ykkar, þið útveguðuð eldsneytið og helltuð á bálið allan tímann. Og afhverju má ég ekki og þjóðin öll eiga grunnþónustuna í friði fyrir HH PB SPK og hinum erindrekum auðs. Hafa þeir ekki nóg nú þegar fyrir sig og sína. Þegar stjórnmálamenn eru jafn spilltir og í FLokknum er engin ástæða til að einkavæða eitt eða neitt sem þjóðin á. Burt með helvítis lúkurnar og látið þetta kjurt. “Peningar eru drifkraftur alls” Já já allt var bara drifið til helvítis og almenningur þarf að moka fram í rauðann dauðann
Að dirfast þess að ætla svo að sitja áfram á Alþingi eftir að hafa komið landi og þjóð á kaldan klaka eða hvernig sem helvíti er innréttað, sýnir best virðingarleysið við þjóðina. Veitið þessum eiginhagsmunaseggjum ekki ykkar atkvæði. Nei það hefur engin endurnýjun átt sér stað, engin endurnýjun á þeim öflum sem eiga og reka FLokkinn og framsóknarliðið. Þið sem kusuð þetta lið síðast, horfist í augu við afleiðingarnar, hræðist ekki gangrýni, farið ekki í afneitun, og reynið ekki að réttlæta Flokkinn það er að berja höfðinu við steininn og þó höfuðið sé tómt hættið samt því skellirnir valda okkur hinum ógleði og verkjum.
Athugið að aðeins einn flokkur af þessum gömlu er óspilltur gefið honum tækifæri til að okkur að moka þjóðina upp úr svaðinu, sjálftökuliðið mun ekki snerta á skóflu frmur en fyrri daginn nema fá greitt fyrir. Ætlið þið að sætta ykkur við að spilling þrífist í stjórnkerfinu og er þá spilling í lagi ef hún er í réttum Flokki?
Skattar? Já gott. Ég greiði mína skatta glaður því ég trúi enn á réttlæti og jöfnuð þrátt fyrir allt. En ég er ekki glaður þegar FLokkurinn sendir mér og börnum mínum reikninginn fyrir það sem þeir hafa ákveðið að taka sér vegna þess að þeir gátu það og gerðu. Nei græðgin blindaði þá ekki þeir gerðu þetta með opin augu, yfirvegað og skipulega og þeir munu gera þetta aftur um leið og færi gefst …….NEMA við komum í veg fyrir það.
